Pryd mae angen i chi wneud cais am Gredyd Cynhwysol
Byddwch yn derbyn llythyr drwy’r post gan yr Adran Gwaith a Phensiynau (DWP)
Mae’n bwysig nad ydych yn gwneud unrhyw beth nes i chi dderbyn eich llythyr. Gelwir hyn yn ‘Hysbysiad Trosglwyddo i Gredyd Cynhwysol’ ac mae’n dweud wrthych pryd mae angen i chi symud i Gredyd Cynhwysol.
Ni chewch eich symud yn awtomatig a rhaid i chi wneud cais am Gredyd Cynhwysol erbyn y dyddiad cau a roddir yn eich llythyr. Cadwch lygad am eich llythyr gan y gallai ei anwybyddu hyd yn oed stopio eich taliadau. Os oes gennych gwestiwn am wneud cais am Gredyd Cynhwysol neu os oes gennych broblem mynd ar-lein, ffoniwch y rhif yn eich llythyr Hysbysiad Trosglwyddo.
Mae credydau treth yn dod i ben yn fuan. Os ydych yn eu derbyn, gwnewch yn siŵr eich bod yn gwneud cais am Gredyd Cynhwysol erbyn y dyddiad yn eich llythyr Hysbysiad Trosglwyddo, hyd yn oed os ydych newydd adnewyddu eich credydau treth.
Ar hyn o bryd mae’r Adran Gwaith a Phensiynau yn anfon llythyrau i gwsmeriaid budd-daliadau, felly os ydych yn hawlio’r budd-daliadau canlynol, cadwch lygad am eich llythyr Hysbysiad Trosglwyddo yn y post:
- Credyd Treth Plant
- Credyd Treth Gwaith
- Budd-dal Tai
- Cymhorthdal Incwm
- Lwfans Ceisio Gwaith yn seiliedig ar incwm (JSA)
- Lwfans Cyflogaeth a Chymorth yn seiliedig ar incwm (ESA)
Bydd llawer o bobl yn gymwys am o leiaf yr un swm ar Gredyd Cynhwysol â’u budd-dal blaenorol.
Os yw eich hawl i Gredyd Cynhwysol yn llai na’ch credydau treth neu fudd-daliadau blaenorol, yna efallai y byddwch yn gymwys i gael amddiffyniad ariannol pan fyddwch yn symud i Gredyd Cynhwysol. Gelwir y swm ychwanegol hwn yn ‘ddiogelwch trosiannol’. Er mwyn helpu i ddangos sut mae diogelwch trosiannol yn gweithio, dyma enghraifft.
Enghraifft
Mae gan Sarah hawl i £700 ar ei budd-daliadau neu gredydau treth presennol.
Ei hawl i Gredyd Cynhwysol yw £600.
Mae hyn yn golygu y bydd diogelwch trosiannol Sarah yn £100.
Mae cyfanswm ei hawl i Gredyd Cynhwysol nawr yn £700.
I fod yn gymwys i gael ‘ddiogelwch trosiannol’:
- dylech ond gwneud cais am Gredyd Cynhwysol ar ôl i chi dderbyn eich llythyr Hysbysiad Trosglwyddo
- mae’n rhaid i chi wneud cais cyn y dyddiad cau yn eich llythyr Hysbysiad Trosglwyddo
- ni ddylai fod unrhyw newidiadau yn eich amgylchiadau
Darganfyddwch fwy am sut mae eich taliadau yn cael eu diogelu.
Bydd y fideo isod yn esbonio sut mae Diogelwch Trosiannol yn gweithio.
Cymhwysedd
Os ydych yn gwneud cais o fewn y dyddiad cau ar eich llythyr, yna nid yw rhai rheolau cymhwysedd Credyd Cynhwysol arferol yn berthnasol i chi.
Os ydych yn derbyn credydau treth, gallwch wneud cais am Gredyd Cynhwysol hyd yn oed os oes gennych arian, cynilion a buddsoddiadau o fwy na £16,000. Ar ôl 12 cyfnod asesu misol, bydd rheolau cymhwysedd arferol yn berthnasol ac ni fyddwch yn gymwys i gael Credyd Cynhwysol os oes gennych dal fwy na £16,000 mewn arian, cynilion a buddsoddiadau.
Gallwch wneud cais am Gredyd Cynhwysol os ydych chi neu’ch partner mewn addysg uwch llawn amser (fel prifysgol) drwy gydol eich cwrs. Darganfyddwch fwy am Gredyd Cynhwysol a myfyrwyr.
Darganfyddwch fwy am gymhwysedd ar gyfer Credyd Cynhwysol.
Ni fydd rhai pobl yn symud i Gredyd Cynhwysol
Ni fyddwch yn symud i Gredyd Cynhwysol os ydych ond yn derbyn Budd-dal Tai ac neu rydych chi a’ch partner:
- o oedran pensiwn y wladwriaeth (66 oed neu drosodd)
- yn byw mewn llety dros dro a ddarperir gan gyngor oherwydd eich bod yn ddigartref
- yn byw mewn llety â chymorth gan gynnwys llochesi, hosteli, tai gofal ychwanegol a rhai tai cysgodol
Yn hytrach, byddwch yn parhau i dderbyn cymorth gyda chostau tai drwy eich Budd-dal Tai presennol.
Os ydych ond cael budd-daliadau dull newydd, naill ai Lwfans Cyflogaeth a Chymorth Dull Newydd (ESA C) neu Lwfans Ceisio Gwaith Dull Newydd (JSA C), yna ni ofynnir i chi symud i Gredyd Cynhwysol.
Os nad ydych chi’n siwr pa fudd-daliadau rydych chi’n eu cael, gallwch siarad ag ymgynghorydd annibynnol.
Credyd Treth ac Oedran Pensiwn y Wladwriaeth
Os ydych yn hawlio credydau treth ac o Oedran Pensiwn y Wladwriaeth, neu rydych yn rhan o Gwpl Oedran Cymysg (ble mae un ohonoch o dan a’r llall dros Oedran Pensiwn y Wladwriaeth) bydd DWP yn ysgrifennu atoch i ofyn i chi wneud cais am Gredyd Cynhwysol neu Gredyd Pensiwn, yn dibynnu ar eich amgylchiadau.
Os gofynnir i chi wneud cais am Gredyd Pensiwn, neu rydych eisoes yn cael Credyd Pensiwn, byddwch yn derbyn llythyr o’r enw Hysbysiad Cau Credyd Treth.
Os ydych o oedran pensiwn y wladwriaeth a gofynnir i chi wneud cais am Gredyd Cynhwysol, gallwch ddewis gwneud cais am Gredyd Pensiwn yn lle hynny, os ydych yn bodloni’r meini prawf cymhwysedd ar gyfer Credyd Pensiwn. Fodd bynnag, os byddwch yn dewis gwneud cais am Gredyd Pensiwn yn lle hynny, pan ofynnir i chi wneud cais am Gredyd Cynhwysol, ni fydd gennych hawl i ddiogelwch trosiannol ac ni fyddwch yn gallu symud i Gredyd Cynhwysol yn nes ymlaen.
Am fwy o wybodaeth ewch i Gymhwysedd am Gredyd Pensiwn.
Pan fyddwch yn symud i Gredyd Cynhwysol efallai y byddwch yn cael gwybod am gredydau treth sydd wedi cael eu gordalu, lle bo’n berthnasol, drwy lythyr gan Gyllid a Thollau EF (CThEF).
Os ydych chi’n poeni am eich cyllid, gallwch ddod o hyd i wybodaeth am gynlluniau talu a sut y gall Rheoli Dyled y DWP helpu. Ewch i GOV.UK am fwy o wybodaeth.
Cyplau Oedran Cymysg ar gredydau treth a Budd-daliadau Tai
Os ydych yn rhan o gwpl oedran cymysg ac yn cael credydau treth a Budd-dal Tai pan fyddwch yn cael eich llythyr i symud i Gredyd Cynhwysol mae’n bwysig eich bod yn gwneud cais fel y cyfarwyddir. Os na wnewch hynny, bydd eich ceisiadau credyd treth a Budd-dal Tai yn cael eu cau yn syth ar ôl y terfyn amser. Ewch i GOV.UK am fwy o wybodaeth arb ethi’w wneud os ydych yn derbyn llythyr Hysbysiad Trosglwyddo pan rydych yn rhan o gwpl oedran cymysg.
Os na fyddwch yn gwneud cais am Gredyd Cynhwysol pan gewch eich gwahodd i wneud, gallwch ailhawlio Budd-dal Tai, cyn belled nad oes unrhyw newidiadau wedi bod i’ch amgylchiadau. Rhaid i chi wneud cais am fudd-dal tai o fewn 3 mis i’ch cais am Fudd-dal Tai ddod i ben neu ni fydd gennych hawl i wneud cais am Fudd-dal Tai fel Cwpl Oedran Cymysg mwyach.
Dylech ofyn am gyngor gan eich Awdurdod Lleol ynghylch ôl-ddyddio eich cais am Fudd-dal Tai.
Taliad Tanwydd Gaeaf
Mae’r Taliad Tanwydd Gaeaf yn gyfandaliad di-dreth i bobl hŷn cymwys er mwyn eu cefnogi gyda chostau i wresogi eu cartref yn y gaeaf.
Mae’r Taliad Tanwydd Gaeaf bellach yn destun prawf modd. Gall unrhyw un sydd wedi cyrraedd oedran Pensiwn y Wladwriaeth erbyn diwedd yr wythnos gymhwyso (16 – 22 Medi 2024), sy’n byw yng Nghymru neu Loegr, ac sydd â hawl i fudd-dal cymwys neu gredydau treth fod yn gymwys i gael taliad ar gyfer gaeaf 2024-25.
Am fwy o wybodaeth, a manylion am y meini prawf cymhwysedd llawn ar gyfer Taliad Tanwydd Gaeaf, ewch i GOV.UK Os ydych yn byw yn yr Alban, ni allwch gael Taliad Tanwydd Gaeaf. Mae Llywodraeth yr Alban yn bwriadu rhoi taliad tebyg. Os ydych yn gymwys, byddwch yn ei gael gan yr Adran Gwaith a Phensiynau.